انصار: (د مرغومی ۲۸ مه) د طالبانو د رژیم د رئیس الوزرا اقتصادي مرستیال ملا عبدالغني برادر ننګرهار ته د سفر پر مهال د دغه ولایت له خلکو غوښتي، چې د ده په ټکیو، پر راغلي امنیت شکر وباسي.
عبدالغني برادر دې غونډه کې د ننګرهار اوسېدونکو ته ډاډ ورکړی چې د امکاناتو برابرېدو په صورت کې به د دوی ستونزو او غوښتنو ته رسېدنه وکړي.
همداراز دې ناسته کې برادر ویلي چې نږدې راتلونکې کې به د سوداګرو ملاتړ په موخه د ننګرهار پر شوکاڼو پر صادراتو ټاکل شوې تعرفه هم راکمه کړي.
د طالبانو له بیا واک ته رسېدو سره، دوی تل خلکو ته د امنیت راوستو خبره کوي او ترې غواړي چې د دوی په ټکیو، په دغه بدلون دې شکر وباسي.
د طالبانو منتقدان بیا د دوی په غبرګون کې وایي، چې مخکې هم امنیت طالبانو خراب کړی و او د دوی له جګړې ختمیدو او واکمنیدو سره امنیت په طبیعي ډول ښه شوی.
د خلکو غوښتنه بیا دا ده، چې طالب چارواکي دې نارینه او ښځینه ټولو ته د زده کړو فرصت برابر او خپل رژیم ته د ملي مشروعیت موندلو تر څنګ اساسي او نور قوانین رامنځته او د واک انحصار پای ته ورسوي.
URL تعقيب: https://www.ansarpress.com/pashto/29674
